Blog

Articles

31-05-2020 | 0 | 212

'సబ్ కా సాత్.. సబ్ కా వికాస్' నినాదంతో 2019 ఎన్నికల్లో ఘనవిజయం సాధించి, ప్రభుత్వాన్ని ఏర్పాటు చేసిన ప్రధానమంత్రి శ్రీ నరేంద్ర మోడి ఏడాది పాలనలో అనేక విజయాలు సాధించారు. దేశంపై చెరగని ముద్ర వేసే విధంగా పలు కీలకమైన నిర్ణయాలు తీసుకున్నారు. సమర్థ విదేశాంగవిధానం, దౌత్యనీతితో భారతదేశాన్ని ప్రపంచంలోనే శక్తిమంతమైన దేశంగా తీర్చిదిద్దారు. ఏడాది కాలంలో కేంద్రప్రభుత్వం సాధించిన విజయాలను ఒక్కసారి గుర్తు చేసుకుంటే...

ముస్లిం మహిళల గౌరవ ప్రతిష్టలను కాపాడడానికి, వారి వివాహ హక్కులను పరిరక్షించడానికి ట్రిపుల్ తలాఖ్ రద్దు చట్టాన్ని తీసుకొచ్చారు. మధ్య యుగాల నాటి అనాగరిక సంప్రదాయాన్ని రద్దు చేయడం వల్ల దేశవ్యాప్తంగా ముస్లిం మహిళలకు న్యాయం జరిగింది.

దేశంలో ఉగ్రవాదాన్ని నిర్మూలించేందుకు ఉగ్రవాద కార్యకలాపాల నిర్మూలన చట్టాన్నితీసుకొచ్చింది. ఈ చట్టం ప్రకారం ఉగ్రవాదానికి పాల్పడే సంస్థలపైనే కాకుండా వ్యక్తులపై కూడా ఉగ్రవాద ముద్ర వేయవచ్చు. అలాంటి వ్యక్తులు విదేశాల్లో ఆశ్రయం పొందితే వారిని భారతదేశానికి తీసుకొచ్చే అవకాశం ఏర్పడింది.

జమ్ము కశ్మీర్ కు ప్రత్యేక ప్రతిపత్తి కల్పిస్తున్న ఆర్టికల్370ని రద్దు చేశారు. గత ప్రభుత్వాలు ఎన్నో ఏళ్లుగా చేయలేని పనిని సాహసోపేతంగా చేశారు. జమ్ము కశ్మీర్ ను సంపూర్ణంగా భారత యూనియన్ లో విలీనమైంది. మిగతా రాష్ట్రాలతో సమానంగా నిలిచింది. దేశంలోని మిగతా ప్రాంతాల వారు అక్కడ స్థిరపడడానికి, వ్యాపారాలు, పెట్టుబడులు పెట్టడానికి అవకాశం కల్పించింది. దేశంలోని మిగతా రాష్ట్రాల మాదిరే భారతీయ చట్టాలను అక్కడ అమలు చేయడానికి మార్గం ఏర్పడింది. ఒకే దేశం, ఒకే జెండా, ఒకే రాజ్యాంగం అమల్లోకి వచ్చింది. 

ఎన్నో ఏళ్లుగా వివాదాస్పదమైన రామజన్మభూమి అంశానికి న్యాయ ప్రక్రియ ద్వారా పరిష్కారం లభించింది. సుప్రీం తీర్పు మేరకు రామాలయ నిర్మాణానికి కేంద్రం ట్రస్టును ఏర్పాటు చేసి, ఆ ట్రస్టుకు భూమిని బదిలీ చేసింది.

భారతదేశానికి సరిహద్దు దేశాలైన అఫ్ఘానిస్థాన్, పాకిస్థాన్, బంగ్లాదేశ్ వంటి దేశాల్లో మతపరమైన అణచివేతకు, పీడనకు గురైన హిందూ, క్రైస్తవ, బౌద్ధ, సిక్కు, పార్శీ, జైన మతస్థులు భారతదేశంలో ఆశ్రయం కోరితే వారికి పౌరసత్వం కల్పించేందుకు పౌరసత్వ సవరణ చట్టాన్ని తీసుకొచ్చారు. దీని వల్ల భారతదేశానికి ఆశ్రయం కోసం వచ్చిన ఎంతోమందికి మేలు జరగనుంది.

రెండవసారి ప్రధానిగా బాధ్యతలు చేపట్టాక నరేంద్రమోడి అమెరికా వంటి పెద్ద దేశాలలోనే కాకుండా గతంలో ఏ ప్రధాని కూడా వెళ్లని దేశాలకు వెళ్లి, ఆయా దేశాలతో దౌత్య సంబంధాలు బలోపేతం చేశారు. ఆర్థిక, రక్షణ, విద్యత్ రంగాల్లో ఒప్పందాలు కుదుర్చుకున్నారు. పాక్ ప్రేరేపిత ఉగ్రవాదం గురించి అంతర్జాతీయంగా అన్ని దేశాలకు వివరించి, పాకిస్థాన్ ను ఏకాకి చేయడంలో విజయం సాధించారు. అమెరికాలో జరిగిన హౌడీ మోడీ, మనదేశంలో జరిగిన నమస్తే ట్రంప్ కార్యక్రమాలు విజయవంతమై, భారత్, అమెరికా దేశాల మధ్య సంబంధాలను బలోపేతం చేశాయి. 

రక్షణ పరంగా కూడా కీలక నిర్ణయాలు తీసుకున్నారు. చీఫ్ ఆఫ్ డిఫెన్స్ స్టాఫ్ ను నియమించారు. త్రివిధ దళాలకు సిడిఎస్ అధిపతిగా వుంటారు. 2020-21 ఆర్థిక సంవత్సరానికి రక్షణ బడ్జెట్కు రూ.4,71,378 కేటాయించారు. రక్షణ రంగంలో మేకిన్ ఇండియాకు ప్రాధాన్యమిచ్చారు. దీని వల్ల దేశీయ తయారీ రంగానికి వూపు రానుంది. 

5 ట్రిలియన్ డాలర్ల ఆర్థిక వ్యవస్థగా భారతదేశాన్ని తీర్చిదిద్దేందుకు వేగంగా చర్యలు తీసుకుంటున్నారు. బీమా, బ్యాంకింగ్ రంగాల్లో సంస్కరణలు. నష్టాల్లో వున్న ప్రభుత్వరంగ బ్యాంకులను ఆదుకునేందుకు చర్యల్లో భాగంగా పది ప్రభుత్వ రంగ బ్యాంకులను విలీనం చేశారు. 

జలశక్తి అభియాన్ ను ప్రకటించి దేశంలో తీవ్ర నీటి ఎద్దడి ఎదుర్కొంటున్న 256 జిల్లాల్లో నీటి సంరక్షణ చర్యలు చేపట్టారు. రెండు లక్షల చెక్ డ్యామ్ లు, చెరువుల పునరుద్దరణ చేశారు.

రైతు సంక్షేమం కోసం ఏటా రూ.87 వేల  కోట్లు కేటాయించారు. పిఎం కిసాన్ సమ్మాన్ నిధి నిబంధనల సరళీకరణ వల్ల రైతులకు మరింత లబ్ధి చేకూరింది. 60 ఏళ్లు దాటిన సన్న,చిన్నకారు రైతులకు నెలకు 3 వేల రూపాయల పెన్షన్ స్కీం ప్రవేశపెట్టారు. 

దేశ రాజధానిలో పరిపాలనా విభాగాలన్నింటినీ ఒకే చోటకి తెచ్చే లక్ష్యంతో సెంట్రల్ విస్టా ప్రాజెక్టుకు రూపకల్పన చేశారు. 70 వేల మంది ఉద్యోగులు పనిచేసే విధంగా రాష్ట్రపతి భవన్ కు కుడి, ఎడమ వైపులన పది భారీ భవనాలను నిర్మించాలని ప్రణాళిక రూపొందించారు.

కరోనా మహమ్మారి వ్యాప్తిని అడ్డుకునేందుకు సమర్థవంతమైన చర్యలు చేపట్టారు. ముందుగానే లాక్ డౌన్ విధించడం వల్ల 138 కోట్ల జనాభాతో కిక్కిరిసి వున్న భారతదేశంలో కరోనా ప్రబలకుండా జాగ్రత్త పడ్డాం. కరోనా కల్లోలం నుంచి వివిధ రంగాలను కాపాడడానికి కేంద్రం రూ.20 లక్షల కోట్లతో ఆత్మ నిర్భర్ భారత్ అభియాన్ ప్యాకేజిని ప్రకటించింది. కరోనా సందర్భంగా భారత్ తీసుకున్న నిర్ణయాలను ప్రపంచ ఆరోగ్య సంస్థ కూడా ప్రశంసించింది.

ఉపాధి హామీ కూలీ పెంచడంతో పాటు ఆ పథకానికి కేటాయించిన రూ.60 వేల కోట్లకు అదనంగా మరో రూ.40 వేల కోట్లు కేటాయించింది. పారిశ్రామిక, వ్యవసాయ రంగాలకు పలు ప్రోత్సాహకాలు ప్రకటించింది. వలస కూలీలను ఆదుకునేందుకు వారికి మూడు నెలల పాటు ఉచిత రేషన్ అందించనుంది. పేదలు దేశంలో ఎక్కడున్నా రేషన్ అందుకునేందుకు 'ఒకే దేశం, ఒకేకార్డు' పథకాన్ని తీసుకురానుంది. 

ఇలా చెప్పుకుంటూ పోతే ఏడాది కాలంలో ఈ ప్రభుత్వం సాధించిన విజయాలు అనేకం వున్నాయి. రాబోయే నాలుగేళ్లలో మోడి గారి సమర్థ నాయకత్వంలో భారతదేశం పారిశ్రామికంగా, ఆర్థికంగా, వ్యవసాయపరంగా, రక్షణపరంగా ప్రపంచంలోనే అగ్రగామిగా నిలబడుతుందన్న నమ్మకం నాకుంది.


30-03-2020 | 0 | 374

ప్రపంచం అంతా కరోనా మహమ్మారిపై యుద్దం చేస్తోంది. కరోనా ధాటికి అభివృద్ధి చెందిన సంపన్న దేశాలైన అమెరికా, చైనా, ఇటలీ, బ్రిటన్, ఫ్రాన్స్, జర్మనీ సైతం విలవిలలాడుతున్నాయి. ప్రపంచ ఆర్థిక వ్యవస్థ అతలాకుతలమవుతోంది. అయితే భారతప్రభుత్వం ఎంతో ముందు చూపుతో 21రోజుల పాటు లాక్ డౌన్ ప్రకటించింది. ఈ సమయంలో సామాన్యులకు ఆర్థిక భద్రత, పేదలకు ఆహార భద్రత కల్పించేందుకు ప్రధాన మంత్రి నరేంద్రమోడి నేతృత్వంలోని కేంద్ర ప్రభుత్వం పలు నిర్ణయాలు తీసుకుంటోంది. పేదల సంక్షేమాన్ని దృష్టిలో వుంచుకుని లాక్ డౌన్ ప్రకటించిన 36 గంటల్లోనే వారి కోసం ప్యాకేజి రూపొందించింది.

లాక్  డౌన్ వల్ల పనులు లేక ఇబ్బందులు పడే నిరుపేదలు, వలస కూలీల కోసం  ప్రధానమంత్రి గరీబ్ కళ్యాణ్ యోజన పేరుతో ఒక లక్షా 70 వేల కోట్ల రూపాయల ప్యాకేజి ప్రకటించింది. ఈ ప్యాకేజి కింద దేశంలో 80 కోట్ల మంది పేదలకు మూడు నెలల పాటు ఉచితంగా నెలకు 5 కిలోల చొప్పున గోధుమలు లేదా బియ్యం, ఒక కిలో పప్పు ధాన్యాలు ఇప్పుడిస్తున్న రేషన్ కు అదనంగా ఇస్తారు. జనధన్ ఖాతాలున్న 20 కోట్ల మంది మహిళలకు మూడు నెలల పాటు నెలకు రూ.500 చొప్పున ఖాతాలో జమ చేస్తారు. 

ఉపాధి హామీ కూలీ రూ.182 నుంచి రూ.202 కు పెంచింది. పిఎం కిసాన్ యోజన లబ్ధిదారులైన రైతులకు ఖరీఫ్ సాయం కింద ఏప్రిల్ లోనే రూ.2 వేలు ఇవ్వనున్నారు. డ్వాక్రా మహిళల రుణ పరిమితిని రూ.10 లక్షల నుంచి రూ.20 లక్షలకు పెంచింది. ప్రధానమంత్రి ఉజ్వల యోజన  పథకం కింద లబ్ధి పొందిన 8.3 కోట్ల కుటుంబాలకు మూడు నెలల పాటు  ఉచితంగా గ్యాస్ సిలెండర్లు సరఫరా చేయనుంది. 60 ఏళ్లు పైబడిన వృద్ధులు, వితంతువులు, దివ్యాంగులకు రెండు విడతల్లో వెయ్యి రూపాయలు ఇవ్వనుంది. 

కరోనా మహమ్మారిపై అలుపెరగని పోరాటం చేస్తున్నవైద్య శాఖ, పారామెడికల్ ఉద్యోగులు, పారిశుధ్య సిబ్బందికి రూ.50 లక్షల వరకు వైద్య బీమా ఇస్తోంది. వందమంది లోపు ఉద్యోగులుండే సంస్థల్లో పనిచేసే వారి పిఎఫ్ కేంద్రమే చెల్లించనుంది. రైతులకు, వ్యవసాయ కూలీలకు కేంద్రం లాక్ డౌన్ నుంచి మినహాయింపు ఇచ్చింది. వారంతా తగిన జాగ్రత్తలు తీసుకుంటూ వ్యవసాయ పనులు చేసుకోవచ్చు. 

ఒకవైపు వ్యాధి ప్రబలకుండా యుద్ధప్రాతిపదికన చర్యలు తీసుకుంటూనే మరో వైపు దేశ ఆర్థిక వ్యవస్థ దెబ్బతినకుండా ముందస్తు జాగ్రత్తలు తీసుకుంటోంది, మధ్యతరగతి, వ్యాపారవర్గాలకు ఊరటనిచ్చే విధంగా రిజర్వ్ బ్యాంక్ ఆఫ్ ఇండియా పలు నిర్ణయాలు ప్రకటించింది. లాక్ డౌన్ నేపథ్యంలో రుణ వాయిదాల చెల్లింపులపై భయాందోళనలకు ఆర్బీఐ చెక్ పెట్టింది. బ్యాంకులిచ్చిన అన్ని రకాల రుణాల కిస్తీలను, క్రెడిట్ కార్డు బిల్లులను మూడు నెలల పాటు వాయిదా వేసింది. వర్కింగ్ క్యాపిటల్ పై వడ్డీలకు మూడు నెలలపాటు మారటోరియం విధించింది. కొత్తగా ఇచ్చే రుణాలపై వడ్డీ రేట్లు తగ్గించింది.

రెపో రేటును 4.4 శాతానికి, రివర్స్ రెపో రేటును 4 శాతానికి తగ్గించడం, బ్యాంకుల నగదు నిల్వ నిష్పత్తిని గణనీయంగా తగ్గించడం వల్ల దేశ ఆర్థిక వ్యవస్థలో నగదు లభ్యత పెరగనుంది. జిడిపిలో 2 శాతానికి సమానమైన రూ.3.74 లక్షల కోట్ల రూపాయలు మార్కెట్లోకి రానుంది. దీని వల్ల పారిశ్రామిక, వ్యాపార వర్గాలకు మేలు జరుగుతుంది. దేశంలో బ్యాంకింగ్ వ్యవస్థ భద్రతకు ఎలాంటి ఢోకా లేకుండా కేంద్రం చర్యలు తీసుకుంటోంది. ప్రభుత్వ,ప్రైవేటు బ్యాంకుల్లో డిపాజిట్లు భద్రంగా వుంటాయి. ప్రజలు ఎలాంటి ఆందోళన చెందాల్సిన అవసరం లేదు. 

మనం తీసుకున్న ముందు జాగ్రత్త చర్యల కారణంగా ఇవ్వాళ్టివరకు మిగతా ప్రపంచం కంటే మనం ఎంతో మెరుగైన స్థితిలో ఈ వైరస్ ను అదుపులో పెట్టాము. పలుదేశాల్లో వేలాది కేసులు,  మరణాలు సంభవించాయి. భారతదేశంలో మాత్రం ఇప్పటివరకు వెయ్యి పైచిలుకు కేసులు మాత్రమే నమోదయ్యాయి. నిజానికి జనంతో కిక్కిరిసి వుండే మన దేశంలో అంటువ్యాధి ప్రవేశించిందంటే దాని విస్తరణను అడ్డుకోవడం చాలా కష్టం.కానీ కేంద్ర ప్రభుత్వం ముందే మేల్కొని కఠిన చర్యలు తీసుకోవడం, ప్రజలు కూడా సహకరించడం వల్ల మనం మిగతా వారితో పోలిస్తే మెరుగైన స్థితిలో వున్నాం. మరికొన్నిరోజులు ఇబ్బందులను తట్టుకుంటే స్వల్ప నష్టంతో మనం బయటపడే అవకాశం వుంది. లాక్ డౌన్ లోను విరామం లేకుండా పనిచేస్తున్న వివిధ ప్రభుత్వ శాఖల సిబ్బంది అందరికీ శతకోటి నమస్కారములు.


12-03-2020 | 0 | 368

అమరావతిని రాజధానిగా  కొనసాగించాలని ఆ ప్రాంత రైతులు ఆందోళన మొదలు పెట్టి ఇప్పటికి మూడు నెలలయింది. 29 గ్రామాల్లో మూడు వేల మంది రైతులపై వివిధ సెక్షన్ల కింద 92 కేసులు పెట్టారు. ఒక్కో రైతుపై మూడు, నాలుగు కేసులు కూడా పెట్టారు. ప్రభుత్వ ప్రోద్బలంతో పోలీసులు తప్పుడు కేసులు పెడుతున్నారు. విచారణ పేరుతో రాత్రిళ్లు ఇళ్లకు వెళ్లి మహిళలను ఇబ్బందులు పెడుతున్నారు. 

ఉద్యమకారులపై కుట్ర కేసులు, హత్యాయత్నం కేసులు కూడా పెడుతున్నారు. కృష్ణాయపాలెంలో తహసీల్దార్ను అడ్డుకున్నారని 428 మందిపై కేసులు పెట్టారు. డ్రోన్ కెమెరాలతో ఓపెన్ టాప్ బాత్రూంలలో స్నానాలు చేసేవారిని ఫోటోలు తీశారని నిరసన తెలిపినందుకు 100 మందిపై కేసులు పెట్టారని రైతులు చెబుతున్నారు. పలు కేసులలో ప్రధాన నిందితుడిగా ఒకరి పేరు పెట్టి మరో 40 మందితో కలిసి చేశారని ఆధారరహితంగా కేసులు నమోదు చేస్తున్నారు. రాజధాని గ్రామాల నుంచి దుర్గగుడికి పాదయాత్రగా బయలుదేరిన మహిళలను అడ్డుకుని వందలమందిపై కేసులు పెట్టారని, ఆంధ్రప్రదేశ్ లో దేవుడి మొక్కులు తీర్చుకునేందుకు కూడా నోచుకోలేదా అని రైతు మహిళలు ఆవేదన వ్యక్తం చేస్తున్నారు.  బాపట్ల ఎంపిని అడ్డుకున్నవారిపై ఎస్సీ ఎస్టీ కేసులు పెట్టారు, కానీ మహిళలపై అతని అనుచరులు దాడి చేస్తే ఫిర్యాదు చేసినా పట్టించుకోలేదని వారు చెబుతున్నారు. పోలీస్ అరాచకాలతో రాజధాని ప్రాంతం విలవిలలాడుతోంది. ఈ ప్రభుత్వం శాశ్వతం కాదు. రేపు మరో ప్రభుత్వం వచ్చినప్పుడు ఇప్పుడు అరాచకాలు చేసిన అధికారులు ఫలితం అనుభవిస్తారు.

వ్యవసాయం చేసుకుంటూ, ప్రశాంతంగా బతుకుతున్న రైతు కుటుంబాలు ఇవ్వాళ కోర్టుల చుట్టూ తిరిగే దయనీయమైన పరిస్థితిని కల్పించాయి ఈ ప్రభుత్వాలు. తరతరాలుగా తమ జీవనాధారంగా వున్న భూమిని  ఆంధ్రప్రదేశ్ రాజధాని కోసం ఇచ్చిన రైతులు నేడు దిక్కుతోచని స్థితిలో రోడ్డెక్కారు. మూడు నెలలుగా చిన్నా, పెద్దా, ఆడ, మగా అంతా నిద్రాహారాలు మానుకుని రోడ్లపై నిరసన తెలుపుతున్నారు. కానీ దున్నపోతుపై వానపడిన చందంగా ఈ ప్రభుత్వానికి, ముఖ్యమంత్రికి కనీసం చీమకుట్టినట్టయినా లేదు. గత మూడు నెలలుగా అనేకమంది రాజధాని ప్రాంత ప్రజలు జైళ్లలో మగ్గుతున్నారు. రాజధాని కోసం మేము భూములిస్తే, ఆ రాజధానిని తరలించి, మమ్మల్ని జైళ్లపాలు చేయడం ఎంతవరకు న్యాయమన్న వారి ప్రశ్నకు జవాబు చెప్పేవాడెవడూ లేకపోవడం విషాదకరం. ఈ ప్రభుత్వం దమననీతిని ఇలాగే కొనసాగిస్తే త్వరలోనే తగిన మూల్యం చెల్లించుకోక తప్పదు.


26-02-2020 | 0 | 160

అమెరికా అధ్యక్షుడు డొనాల్డ్ ట్రంప్ రెండు రోజుల భారత పర్యటన విజయవంతంగా ముగిసింది. భారత్, అమెరికా సంబంధాలు బలోపేతం చేసుకోవడమే లక్ష్యంగా సాగిన ఈ పర్యటన రెండు దేశాల మధ్య వ్యూహాత్మక భాగస్వామ్యం బలపడేందుకు దోహదం చేసింది. ముఖ్యంగా ప్రధానమంత్రి నరేంద్రమోడి దౌత్యనీతి, ప్రపంచ దేశాల్లో భారతదేశ గౌరవాన్ని, ఇనుమడింపచేసిన పర్యటన ఇది. హౌడి-మోడి, నమస్తే ట్రంప్ కార్యక్రమాల ద్వారా నరేంద్రమోడి ప్రపంచంలోనే బలమైన నేతగా గుర్తింపు పొందారు.

ట్రంప్ పర్యటన తొలి రోజున అహ్మదాబాద్ లో రోడ్ షో, మొతెరా స్టేడియంలో 1.25 లక్షల మంది హాజరైన భారీ బహిరంగసభ అద్భుతంగా జరిగాయి. ఒక విదేశీ అధినేత భారతదేశంలో ఇంత భారీ జనసమూహాన్ని ఉద్దేశించి ప్రసంగించడం ఇదే మొదటిసారి. రెండు దేశాల్లోని కోట్లాది మంది ప్రజలతో పాటు యావత్ ప్రపంచం దీన్ని వీక్షించింది.

 ట్రంప్ పర్యటన సందర్భంగా భారత్, అమెరికాల మధ్య రూ. 21 వేల కోట్ల విలువైన రక్షణ ఒప్పందం జరిగింది. ఒప్పందంలో భాగంగా 24 ఎంహెచ్-60  రోమియో హెలికాప్టర్లు భారతీయ నౌకాదళం కోసం కొనుగోలు చేయనున్నారు. ఆరు ఎహెచ్ - 64 అపాచీ హెలికాప్టర్లను భారత ఆర్మీ అవసరాల కోసం కొనుగోలు చేస్తారు. భారత అమ్ములపొదిని అత్యాధునికమైన అస్త్రాలతో బలోపేతం చేస్తున్నామని ఈ సందర్భంగా ట్రంప్ వ్యాఖ్యానించడం గమనార్హం. ఈ ఒప్పందం రెండు దేశాల రక్షణ సంబంధాలను బలోపేతం చేయనుంది. దీంతో పాటు ఇండియన్ ఆయిల్ కార్పొరేషన్, ఎగ్జాన్ మొబిల్ ఇండియా ఎల్ఎన్జీ లిమిటెడ్ , అమెరికాకు చెందిన చార్జ్ ఇండస్ట్రీస్ మధ్య సహకారానికి ఒప్పందం కుదిరింది. వైద్య ఉత్పత్తుల భద్రతపై భారత కేంద్రీయ ఔషధ ప్రయోగాల నియంత్రణ సంస్థకు, అమెరికాకు చెందిన ఎఫ్ డిఎకు మధ్య ఒప్పందం కుదిరింది. 

అంతర్గత భ్రదత, రక్షణ, ఇంధనం, సాంకేతిక, ప్రజల మధ్య సత్సంబంధాలు అనే అంశాలపై చర్చలు జరిగాయి. రక్షణ పరంగా భారత్ దేశానికి అత్యంత ప్రాధాన్యత ఇస్తానని ట్రంప్ హామీ ఇవ్వడం భారతదేశ భద్రతకు మేలు చేకూర్చనుంది.  ఉగ్రవాద కార్యకలాపాలను తుడిచిపెట్టాలని తీర్మానించడం. ఇస్లామిక్ ఉగ్రవాదంపై కలిసి పోరాడతామని ట్రంప్ పేర్కొనడం పరోక్షంగా పాకిస్థాన్ కు హెచ్చరికలు చేయడమే. కశ్మీర్ అంశం, సరిహద్దు సమస్యల కారణంగా పాకిస్థాన్, చైనాలతో శతృత్వాన్ని దృష్టిలో పెట్టుకుని అంతర్జాతీయంగా మద్దతు కూడగట్టుకోవాల్సిన నేపథ్యంలో భారతదేశానికి అమెరికా సహకారం కీలకం. దీన్ని సాధించడంలో ప్రధానమంత్రి నరేంద్రమోడి విజయవంతమయ్యారని చెప్పవచ్చు. 

తన పర్యటనలో ట్రంప్ పలుమార్లు భారత్ మహత్తర దేశమని, మోడి బలవంతుడైన నేత అని పేర్కొనడం భారతదేశం పట్ల, ప్రధాని మోడి పట్ల అమెరికా అభిప్రాయాన్ని ప్రతిబింబిస్తోంది. భారత్ లో వివిధ మతాలకు చెందిన కోట్లాదిమంది ప్రజలు సామరస్యంగా జీవిస్తూ, తమ మత ధర్మాలు పాటించుకునే అవకాశం ప్రపంచానికే ఆదర్శమంటూ, తన మిత్రుడు నరేంద్రమోడి సమర్థ నాయకత్వంలో భారత్ బలమైన దేశంగా ఆవిర్భవిస్తుందని ట్రంప్ చెప్పడం శుభసూచికం. మొత్తంగా ట్రంప్ పర్యటన ఇరుదేశాల మధ్య స్నేహసంబంధాలు పటిష్టం చేసుకునే దిశగా ముందడుగుగా భావించాలి.


13-02-2020 | 0 | 183

ముఖ్యమంత్రి జగన్మోహన్ రెడ్డి ఎనిమిది నెలల పాలనలో రాష్ట్రం అన్ని రంగాల్లో తిరోగమనంలోకి పయనిస్తోంది. రాష్ట్ర ఆర్థిక పరిస్థితి అస్తవ్యస్తంగా మారింది. డిసెంబరు నెలాఖరుకు లక్షా 72 వేల కోట్ల రెవెన్యూ వసూళ్ల సాధన లక్ష్యం కాగా, వసూలైంది రూ.72 వేల కోట్లు మాత్రమే. రాష్ర్ట ఆర్థిక పరిస్థితికి ఈ అంకెలే ఉదాహరణ.  జగన్ ప్రభుత్వం తీసుకుంటున్న నిర్ణయాల వల్ల దేశ విదేశాల్లో ఆంధ్రప్రదేశ్ కున్న పేరు, పరపతులు దెబ్బతింటున్నాయి. పెట్టుబడులు పెట్టేందుకు పారిశ్రామికవేత్తలు ముందుకు రాకపోగా, వున్న పరిశ్రమలు తరలిపోతాయనే ప్రచారం భయాందోళనలకు గురిచేస్తోంది.  ప్రపంచవ్యాప్తంగా పెట్టుబడుల కోసం రాష్ట్రాలు, దేశాలు పోటీపడుతున్న వాతావరణం వుంది. పరిశ్రమల స్థాపనకు ముందుకొచ్చిన వారికి రెడ్ కార్పెట్లు పరుస్తున్నారు. కానీ ఎపిలో అందుకు పూర్తి విరుద్ధంగా జరుగుతోంది. పరిశ్రమల స్థాపన వల్ల ఉద్యోగ, ఉపాధి అవకాశాలు పెరగడంతో పాటు, రాష్ట్రానికి ఆదాయం పెరుగుతుంది. జగన్మోహనరెడ్డి ప్రభుత్వానికి ఇవేమీ పట్టడం లేదు. 

అధికారంలోకి వచ్చింది మొదలు వ్యక్తిగత కక్షలు తీర్చుకోవడమే ప్రధాన ఎజెండాగా పెట్టుకున్నట్టు కనిపిస్తోంది. తిరుపతిలో 15 వేల కోట్ల పెట్టుబడితో ఎలక్ట్రానిక్స్ పార్క్ పెట్టడానికి ముందుకొచ్చిన రిలయన్స్ ఇప్పుడు పునరాలోచనలో పడింది. వైజాగ్ లో అదానీ డేటా సెంటర్ వెనక్కి పోయింది. అదే సమయంలో హైదరాబాద్ లో అమెజాన్ పదివేల కోట్లతో డేటా సెంటర్ పెట్టబోతోంది. ఈ ప్రభుత్వపు తుగ్లక్ చర్యల మూలంగా ఎపి నష్టపోతుంటే, పక్క రాష్ట్రాలు బాగుపడుతున్నాయి. అమరావతి నుంచి రాజధాని మార్చే ప్రతిపాదనల వల్ల హైదరాబాద్ రియల్ ఎస్టేట్ రంగంలో దేశంలోనే నెంబర్ వన్ అయింది. 

ప్రతిపక్షంలో వుండగా పెన్షన్లు పెంచుతామని, కరెంటు చార్జీలు తగ్గిస్తామని చెప్పిన జగన్ ఇప్పుడు అందుకు విరుద్ధంగా పోతున్నారు. కరెంటు చార్జీలు పెంచారు. బస్ చార్జీలు పెంచారు. ఫైబర్ గ్రిడ్ కేబుల్ బిల్లులు పెంచారు. పెట్రోల, డీజిల్ పై ట్యాక్స్ పెంచారు. పెన్షన్లు, రేషన్ కార్డులకు కోతపెట్టారు. సంప్రదాయేతర విద్యుత్ రూ.4.50 పైసలు చెల్లించడం చాలా ఎక్కువ అని విద్యుత్ కొనుగోలు ఒప్పందాలు రద్దు చేసిన ఈ ప్రభుత్వం థర్మల్ పవర్ ను అంతకంటే ఎక్కువ రేటుకు కొంటుంన్నారు.  పోలవరం పనులు ఆగిపోయాయి. పోలవరం ఖర్చు కింద కేంద్రం ఇచ్చిన 1850 కోట్ల రూపాయలు ఇతర అవసరాలకు మళ్లిస్తున్నారు. ఇసుక దొరకడం గగనమైపోయింది. రాజధాని తరలింపుపై ఏకపక్ష పోకడలు పోతున్నారు. తరలింపు బిల్లును సెలక్ట్ కమిటీకి పంపినందుకు మండలిని రద్దు చేయాలని నిర్ణయం తీసుకున్నారు.

నచ్చని అధికారులపై వేధింపులకు పాల్పడుతున్నారు. రాష్ట్రంలో ఫ్యాక్షనిస్టు తరహా పరిపాలన సాగుతోంది. జగన్ ది తుగ్లక్ పాలన అని పలు జాతీయ, అంతర్జాతీయ పత్రికలు సైతం విమర్శలు గుప్పిస్తున్నాయి. కానీ జగన్ ప్రభుత్వం ఇవేమీ పట్టకుండా నియంతృత్వ పోకడలు పోతోంది. ప్రజలు తిరగబడితే పెద్ద పెద్ద నియంతలే కాలగర్భంలో కలిసిపోయిన సంఘటనలు ప్రపంచంలో కోకొల్లలు. కాబట్టి ప్రజాగ్రహం దహించక ముందే తన చర్యలను సరిదిద్దుకోవాలని జగన్మోహనరెడ్డిగారిని కోరుతున్నాను.


Next

Stay connected